બોલીવૂડના દિગ્ગજ અભિનેતા ઋષિ કપૂરની છેલ્લી ફિલ્મ ‘શર્માજી નમકીન’ ટૂંક સમયમાં OTT પ્લેટફોર્મ પર રિલીઝ થવા જઈ રહી છે. પોતાની બિમારીને કારણે ઋષિ કપૂર આ ફિલ્મનું શૂટિંગ પૂરું કરી શક્યા નહોતા. ત્યારબાદ તેમનું પાત્ર પરેશ રાવલે ભજવ્યું હતું અને ફિલ્મ પૂરી થઈ હતી. પીઢ અભિનેતાએ 30 એપ્રિલ 2020 ના રોજ આ દુનિયાને અલવિદા કહ્યું. ત્યારથી ચાહકો તેમની છેલ્લી ફિલ્મના આગમનની રાહ જોઈ રહ્યા હતા.
ફરહાન અખ્તરે ઈન્સ્ટાગ્રામ પર ફિલ્મનું પોસ્ટર શેર કરતા લખ્યું કે, શર્માજી આપણા જીવનમાં તડકા લગાવવા માટે આવી રહ્યા છે. 31 માર્ચે વર્લ્ડ પ્રીમિયર થશે. આ પોસ્ટ આવતાની સાથે જ ઋષિ કપૂરના ચાહકોની પ્રતિક્રિયાઓ શરૂ થઈ ગઈ છે. એક યુઝરે જણાવ્યું કે, આ ફિલ્મને થિયેટરમાં રિલીઝ કરવી જોઈએ.
ઋષિ કપૂરની સાથે આ ફિલ્મમાં સતીશ કૌશિક, જુહી ચાવલા, તારુક રૈના, સુહેલ નય્યર, શીબા ચઢ્ઢા અને ઈશા તલવાર મુખ્ય ભૂમિકામાં છે. આ ફિલ્મ 31 માર્ચે એમેઝોન પ્રાઈમ વીડિયો પર રિલીઝ થશે. આ ફિલ્મના નિર્દેશક હિતેશ ભાટીયા છે. આ ફિલ્મનું નિર્માણ રિતેશ સિધવાની અને ફરહાન અખ્તરના એક્સેલ એન્ટરટેઈનમેન્ટની સાથે હની તેહરાન અને અભિષેક ચૌબે દ્વારા કરવામાં આવ્યું છે.
તમને જણાવી દઈએ કે આ પહેલી હિન્દી ફિલ્મ છે જેમાં બે દિગ્ગજ અભિનેતા ઋષિ કપૂર અને પરેશ રાવલ એક જ પાત્ર ભજવતા જોવા મળશે. જ્યારે આ ફિલ્મનું શૂટિંગ ચાલી રહ્યું હતું ત્યારે ઋષિ કપૂરની તબિયત ખરાબ થઈ ગઈ હતી જેના કારણે તેમણે બાકીની ફિલ્મનું શૂટિંગ કર્યું ન હતું.
ફિલ્મની વાર્તા એક નિવૃત્ત પુરુષની વાર્તા પર છે જે મહિલાઓના કિટી વર્તુળમાં જોડાયા પછી રસોઈનો શોખીન બની જાય છે. તે આત્મ-અનુભૂતિ અને સ્વ-શોધની એક રસપ્રદ અને હૃદયસ્પર્શી વાર્તા છે.
