આવી ગઈ ભારતની પ્રથમ હાઈડ્રોજન કાર, કેન્દ્રીય મંત્રી નીતિન ગડકરીએ સંસદ સુધી કરી સવારી

હવે ટૂંક સમયમાં ભારતના રસ્તાઓ પર હાઈડ્રોજન કારો (Hydrogen Car) દોડતી જોવા મળી શકે છે. બહુપ્રતિક્ષિત પ્રથમ હાઇડ્રોજન કાર ભારતમાં તેની સફર શરૂ કરી ચૂકી છે. કેન્દ્રીય માર્ગ, પરિવહન અને રાજમાર્ગ મંત્રી નીતિન ગડકરીએ બુધવારે આ કારમાં સવારી કરી.

કેન્દ્રીય મંત્રી આજે આ અદ્યતન કારમાં સવાર થઈને સંસદ પહોંચ્યા હતા. આ દરમિયાન સ્વચ્છ ઈંધણ પર ચાલતી આ કાર લોકોના આકર્ષણનું કેન્દ્ર બની. આ કારને ટોયોટા કંપનીના પાયલોટ પ્રોજેક્ટ હેઠળ બનાવવામાં આવી છે અને તેમાં એડવાન્સ ફ્યુઅલ સેલ લગાવવામાં આવ્યા છે. આ અદ્યતન સેલ ઓક્સિજન અને હાઇડ્રોજનના મિશ્રણથી વીજળી ઉત્પન્ન કરે છે. આજ વીજળીથી કાર ચાલે છે. ઉત્સર્જનના રૂપમાં આ કારમાંથી માત્ર પાણી બહાર નીકળે છે.

ઇકો-ફ્રેન્ડલી છે આ કાર

નીતિન ગડકરીએ કહ્યું કે, આ કાર સંપૂર્ણપણે પર્યાવરણને અનુકૂળ છે અને કોઈપણ પ્રકારનું પ્રદૂષણ નથી ફેલાવતી. તેમણે કહ્યું કે, આ કાર ભારતનું ભવિષ્ય છે. પેટ્રોલ અને ડીઝલ એન્જીનવાળી કાર ખૂબ જ પ્રદુષણ ફેલાવે છે, પરંતુ હાઈડ્રો ફ્યુઅલ સેલ કાર કોઈ પણ પ્રકારનું પ્રદૂષણ ફેલાવતી નથી.

નામનો મતલબ જ છે ભવિષ્ય

Toyota Kirloskar Motors (Toyota)એ તાજેતરમાં ભારતીય બજારમાં તેની હાઇડ્રોજન કાર Toyota Mirai લૉન્ચ કરી છે. હાઈડ્રોજન ફ્યૂલ સેલ પર ચાલતી આ દેશની પ્રથમ કારને ગડકરીએ જ લૉન્ચ કરી હતી. રસપ્રદ વાત એ છે કે કારના નામનો અર્થ પણ એ જ છે. જાપાની ભાષામાં ‘મિરાઈ’ શબ્દનો અર્થ થાય છે ભવિષ્ય.

આ રીતે કામ કરે છે કાર

ટોયોટાએ આ કાર માટે હાઇડ્રોજન આધારિત ફ્યુઅલ સેલ સિસ્ટમ વિકસાવી છે. વાસ્તવમાં આ એક ઇલેક્ટ્રિક ગાડી પણ છે, જે હાઇડ્રોજનનો ઉપયોગ કરીને ચલાવવા માટે જરૂરી વીજળી બનાવે છે. તેના ફ્યૂલ ટેન્ક સાથે હાઇડ્રોજનની સપ્લાય Fuel Cell Stackને કરવામાં આવે છે. આ કાર ચારેય બાજુ હવામાં હાજર ઓક્સિજનને ખેંચે છે. પછી આ બે વાયુઓની રાસાયણિક પ્રક્રિયા પાણી (H2O) અને વીજળી ઉત્પન્ન થાય છે. કાર ચલાવવા માટે વીજળીનો ઉપયોગ થાય છે, જ્યારે સાઇલેન્સરમાંથી પાણી નીકળે છે.